കൂത്താട്ടുകുളം: എംസി റോഡില് മൂവാറ്റുപുഴയ്ക്കും കൂത്താട്ടുകുളത്തിനുമിടയിൽ ആറൂര് ചാന്ത്യം കവലയ്ക്കു സമീപം കാറിടിച്ച് ബൈക്ക് യാത്രികൻ മരിച്ചു. അഞ്ചല്പ്പെട്ടി സ്വദേശി ചായേലില് പുത്തന്പുരയില് റോയ് വര്ഗീസ് (60) ആണ് മരിച്ചത്. ഇന്നലെ രാവിലെ ഒമ്പതോടെയായിരുന്നു അപകടം.
മൂവാറ്റുപുഴ ഭാഗത്തുനിന്ന് കൂത്താട്ടുകുളം ഭാഗത്തേക്കു പോകുകയായിരുന്ന ബൈക്കിൽ പണ്ടപ്പിള്ളി ഭാഗത്തുനിന്നു മൂവാറ്റുപുഴ ഭാഗത്തേക്കു വരികയായിരുന്ന കാര് ഇടിക്കുകയായിരുന്നു. ഗുരുതരമായി പരിക്കേറ്റ റോയിയെ മൂവാറ്റുപുഴയിലെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
മൃതദേഹം പോസ്റ്റ്മോര്ട്ടത്തിനുശേഷം ബന്ധുക്കള്ക്ക് വിട്ടുനല്കി. അപകടത്തിനിടയാക്കിയ കാറില് സഞ്ചരിച്ചിരുന്ന രണ്ടുപേരും പരിക്കേല്ക്കാതെ രക്ഷപ്പെട്ടു. അപകടത്തെത്തുടര്ന്ന് മൂവാറ്റുപുഴ-കൂത്താട്ടുകുളം എംസി റോഡില് ഗതാഗതം തടസപ്പെട്ടു. മൂവാറ്റുപുഴ പോലീസെത്തി റോഡില്നിന്നു വാഹനങ്ങള് നീക്കം ചെയ്ത് ഗതാഗതം പുനഃസ്ഥാപിച്ചു.